Sny dit af, sny dit af…

Ek sal nou nie sê dat ek geseën is met “super powers”nie, maar soms gebeur daar shit wat ek nie kan verduidelik nie.  Behalwe vir die paar kere wat ek as tiener snags wakker geword het met “sleep paralysis” (wat ek blameer op die sangoma wat in ons huis gewerk het – sy het my fokhol gelike nie.  My selfs eenkeer aan die keel opgetel, die ou teef!) het ek eers later in my lewe vreemde dinge begin ervaar.

Ek het byvoorbeeld nooit veel erg gehad in spoke nie.  Ek het geweet hulle bestaan, maar ek het dit nooit gesien of gevoel nie.  Totdat ek begin werk het en op ‘n gereelde basis in leë huise moes gaan, dan het ek soms so aardige “vibe” gekry het hier van agter af.  Later sou ek op die betrokke huis se geskiedenis ingaan en uitvind dat daar wél iets gebeur het wat die vreemde gevoel bevestig.  Maar ek síén steeds nie die spoke nie.  Ook maar goed so…  Ek sal vir my ‘n huisie kak…

So vyftien jaar terug het ek my eerste ondervinding van ‘n “voorbode” gehad.  Dalk is al hierdie gebeurtenisse toeval, wat ek graag sou wou glo.  Dit is vir my een moerse irritasie as die kerktannies vir my sê dat ek dit moet “afsny”. ‘n Mens kan nie beheer wat jy droom, sien en voel nie.

Terug by my eerste “voorbode”.

Ek het ‘n huis uitverhuur en moes inspeksie gaan doen het voordat die huurders ingetrek het.  Die beste tyd om ‘n inspeksie te doen is terwyl ‘n huis nog leeg staan want dan sien jy kolle teen die mure, stukkende plekkies op die mat en gekraakte ruite beter.  Ek stop toe daar met my Uno’tjie en ek sluit oop en in is ek.  Dadelik trek ek my neus op vir die laslappie-huis.  Krake so groot dat die bossies van buite af binne toe groei.  Anyway, gewapen met my clipboard gaan ek deur die donker huis en maak aantekeninge.  Ek voel aanvanklik nie dat ‘n spook my van êrens af dophou nie.  Niks sulke dinge nie.  Dis maar net ‘n kak huis, geverf met ‘n kak kleur in ‘n kak area.  Toe ek in die hoofslaapkamer kom, toe begin ek so half angstig voel.  ‘n Onbeskryflike depressiewe, hartseer gevoel het oor my gekom.  Skielik het alles begin bewe.  Soos ‘n aardbewing (wat ek al twee keer beleef het, so by the way)  maar nie van onder na bo nie.  Nee.  In hierdie geval het die plafon eers begin ruk en bewe, toe die ruite en laastens, die grond.  Pappa, maar ek trek my klikkie-klakkie-skoene uit en ek maak gat skoon!  Fok die res van die inspeksie!

Ek het my ondervinding stil gehou want “wat sal die mense tog sê?”  Ek het wél hier en daar probeer uitvind of daar aardbewings of selfs mynaktiwiteite daardie tyd plaasgevind het.  Daar het nie.  Die volgende dag het die huurders die sleutels by my kom haal en ingetrek.  Ek het toe besig geraak en kon nie die inspeksie dadelik voltooi nie.

Omtrent ‘n week nádat hulle ingetrek het, toe bel ek die vrou en vra of ek gou die inspeksie kan gaan klaarmaak.  Sy wou aanvanklik nie hê dat ek moes kom nie “want dit is ‘n slegte tyd”.  Ek dog toe sy is nog in haar “nighties” en dring toe daarop aan dat ek oppad is.

Daar aangekom toe is die arme vrou se oë rooi gehuil en die hele sitkamer is vol treurende mense.  “Verskoon maar.  Ons het dood in die familie gehad…”  maak die vrou verskoning.  Toe ek vra wat gebeur het, vertel sy my dat haar seun die vorige dag selfmoord gepleeg het.  In die hoofslaapkamer, Bybel in die hand.  Hy het deurmekaar geraak met ‘n meisie wat in die okkulte was en toe hy haar wou los het sy en haar trawante die lewe so moeilik vir hom gemaak dat dit sy enigste uitkoms was.  Ek onthou tot vandag toe die gat in die plafon (die skoot is regdeur sy skedel) en die bloed-kol op die mat.  Ek was dom van skok!

Sewe en ‘n half jaar terug moes ek ‘n groot operasie aan my rug gekry het.  Ek het ‘n week in die hospitaal spandeer en my eksman het nie moeite gedoen om een keer te kom kuier nie.  Die aand voordat ek ontslaan was, het ek gedroom dat ons skei.  Die volgende dag toe ek ontslaan word, het ek my goed by die huis gepak en hom gevra vir ‘n egskeiding.  Ek het nooit weer langs hom geslaap nie.  Ek is reguit uit die hospitaal na my ma toe.  Natuurlik het ek een moerse blik wurms oopgemaak want hy het ‘n seksuele teisteringsaak teen hom gehad, SARS het sy rekeninge gevries en hy het allerhande onnoemlike kak aangejaag terwyl ons getroud was.  Ek is nie nou lus om daaroor uit te brei nie.  Die feit is net dat, vóór die droom, skei nie ‘n opsie vir my was nie.

Twee en ‘n half jaar terug het ek ‘n droom gehad van die Tiener se skool.  ‘n Leë graf op die rugbyveld.  Skoolkinders wat om die graf staan en ween.  Ek het nog gegrap en vir een van die ma’s op die beheerliggaam gesê dat sy vir die skoolhoof moet sê om vir ‘n mediese “check-up” te gaan.  ‘n Week daarná word ons in kennis gestel dat hy prostaatkanker het.  Hy is gelukkig, ok.

Daarná het ek gereeld drome gekry van mense wat ek ken.  Veral drome oor kanker.  Soos die een meisie wat saam met my gewerk het.  Een dag het haar ma het begin kla van erge maagpyn en kon haar kos nie inhou nie.  Hulle het haar dokter toe gevat en haar behandel vir gastro.  Ek het kort daarná van haar ma gedroom en, in die droom, was haar maag die ene vrot vleis.  Sy is ‘n paar weke ná dit dood aan maagkanker.

Verlede jaar, die aand vóór oujaarsaand (ek kan dit nie vergeet nie) het ek van ‘n ou vriendin gedroom.  Haar bolyf was kaal en ek kon die letsels sien waar haar borste verwyder was.  Sy het ‘n “bandana” op haar kop gehad.  Die volgende oggend het ek op my sussie se stoep gaan sit (ons het by haar gaan kuier in die Kaap) en rook en bietjie op my Facebook gaan rondkrap.  Daar sien ek toe ‘n boodskap van dié vrou se dogter op haar “wall” dat hulle vir haar ‘n spoedige herstel toewens.  Borskanker.  Sy veg steeds dapper.

Die aand voor my ouma se dood het ek nie gedroom nie.  Ek het buite gesit en vir omtrent twee of drie sekondes het ek ‘n duidelike visioen gekry van gordyne (díé wat die hospitaalbeddens van mekaar skei) wat toegeruk word.  Ek het my gat afgeskrik want ek kry gewoonlik drome en ek “voel” as iets nie pluis is nie, maar hierdie was soos ‘n prentjie wat vir ‘n paar sekondes duidelik voor my geestesoog afgespeel het.  Die volgende middag het dit gereën en ‘n duidelik reënboog het oor my huis gevorm.  Daar het ‘n skielike kalmte oor my gekom en ek het die tye onthou dat ek en my ouma in verwondering na reënboeë kon kyk.  Sy is daardie aand net ná nege oorlede.

Net voor die Julie skoolvakansie toe droom ek my skoonma lê in die hospitaal met haar arm in gips.  Dit kan baie dinge beteken.  My skoonouers was toe oppad kus om die een klein nefie op ‘n rugbytoer te vergesel.  Ek vertel toe vir die mister van my droom en sê vir hom hy moet vir hulle vra om versigtig te ry.  “Ag, liefie die drome van jou is ‘n klomp kak!”  Wie kom toe terug van die see af met haar arm in ‘n “sling”?  Hulle was oppad terug van die see af toe stop hulle by ‘n Ultra City en daar slat my skoonma soos ‘n os neer en maak haar skouer seer!

Nou vra ek jou met trane in my mooi blou ogies?  Kan mense sulke goed net “afsny”?

64489ce926a99d7bbb1fa222650ab2d5

507ae38e1b94a1d75a3550fa2ce5c0a7

7 thoughts on “Sny dit af, sny dit af…

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s